نحن الليلة...ما عندنا مشكلة معاكم.
* ما عندنا مشكلة مع اي زول....
* بالنا رايق ومرتاحين ...الزول المتوتر يقفل تلفونو.
* نحن الليلة عاوزين نكون (اصحاب) للاعبي الهلال....لن نشجعهم فقط.
* بيناتنا (صحبة)...وونسة وضحكة ومشوار.
* عاوزين نقيل معاكم ...نقعد بعد الافطار ...تشربوا الشاي معانا ونشرب القهوة معاكم.
* اتخلصوا من كل (الضغوط)...من كل المشاكل ..عشان نبني إلفة جديدة ..فيها مودة ومحبة.
* الدنيا رمضان...ما في زول يشاكل ليه زول ..او يغلط ليه علي احد..ما تكوركوا ليكم في لاعب.
* الدنيا فيها شنو؟.
* عشان تزعلوا ..او تغضبوا ليكم من زول.
* انتوا عارفين (الانتصار) احساس...يعني زول ما شعر بالفوز ما بحققو.
* اذا ما كانت عندكم رغبة قوية في الفوز لن تنتصروا...لن تفوزوا.
* يجب ان تقدموا (عرض) افضل من عرض المريخ حتي يأتي لكم الانتصار.
* المريخ لن يكون مكتوف الايدي ..سوف يعمل ويقدم اجمل ما عنده لينتصر.
* انتوا قدموا عرض اجمل.
* العرض الاجمل لن يكون إلا بالاداء الطيب والرغبة القوية.
* الجمهور مفروض يشارك اي لاعب في الهلال في (التمريرة)...عشان اي تمريرة بشارك فيها الجمهور بتكون هدف.
* امنحوهم الثقة من المدرجات ..حتي يعطوكم النصر من الملعب.
* لو فاز الهلال الحمدلله.
* لو اتعادل ما عندنا مشكلة.
* ولو خسر لا قدر الله سوف نعمل جميعا من اجل ان نبدل تلك الخسارة الي انتصار.
* اذا كانت هناك (مشاركة) حقيقية من الجميع سوف يكون هناك انتصار.
* ما تزعلوا ما في حاجة بتستاهل.
* بنغضب ..بنزعل ..بنتكلم ..لكن وقت المباراة بنرمي الحاجات دي كلها وراء ضهرنا.
* سوف نتعامل مع كل الامور بهدوء ومنطق.
* عندما نحكم الهدوء والمنطق يكون الانتصار.
* مطلوب من لاعبي الهلال ان يلعبوا بمزاجيتهم ...ان يمتعوا انفسهم اول حاجة عشان يمتعوا الجمهور.
* اعملوا اي حاجة بالكورة.
* كلكم عندكم الموهبة والامكانيات التي تجعلكم قادرون علي ان تفعلوا ما تشاءون بالكورة.
* ألعبوا بطمئنينة عشان تنتصروا.
* الخوف والانتصار لا يجتمعان.
* الثقة هي الشرط الاول في الانتصار من بعد يأتي احترامكم للخصم الذي تلعبون ضده.
* انتم تلعبون امام المريخ...وهو قبل اي شيء ند لكم والانتصار عندما يكون علي الند يكون احلي واجمل.
* قاعدتكم يسعدها كثيرا انتصاركم علي ندكم.
* هذا الانتصار اذا تحقق باذن الله وتوفيقه سوف يجعلكم في المربع الذهبي.
* هل تبخلون لبلوغ دور الاربعة بثلاث نقاط.
* هل تمنعون عن جماهيركم ان تسعدوها اليوم بانتصار علي المريخ.
* جمهوركم ايضا سوف يسعدكم..سيقف معكم ..سوف يقطع من قوت عياله من اجل ان يكون معكم اليوم وانتم تلعبون في استادكم.
* حتي الذين لن يدخلوا للمباراة اليوم ..سوف تكون قلبوهم معكم.
* في حلفا ..في نمولي ..في القضارف ..في شندي ..كسلا ..كوستي ..الابيض ...الفاشر ..نيالا.
* في البدو ..في الحضر.
* التلفونات ...شغالة بتسأل عنكم...الجرايد بتكتب ليكم...الاذاعات..الفضائيات تراقبكم.
* كل الناس منتظراكم ان تفرحوها بي هدف.
* الكل يحبكم....يتابعكم بلهفة ..حتي الذين هم في الخارج...السعودية ..الامارات...قطر ...البحرين ..مصر..استراليا ..امريكا ..السويد.
* كل الناس هناك تراقبكم ..يعودون سرا بقلوبهم الي البلاد في هذا المساء..ليكونوا معكم.
* خلوا اولادهم ..بيوتهم ...ودوروا تلفونات ..ودخلوا النت ..عشان يقرأوا عنكم حاجة تسعد.
* عشان تطمئن قلوبهم.
* الشفقة كاتلاهم.
* انتوا يا ناس هيثم وفييرا والمعز وحمودة لو عاوزين تفرحوا الناس ديل..قدموا ليهم عرض جيد.
* العبوا ليهم كورة صاح.
* هم ما عاوزين منكم اكتر من كدا.
* النتيجة ما مضمونة ..الكورة ما معروفة...عشان كدا ما بنسألكم منها..ولا عاوزنكم تشتغلوا بيها كتير.
* الحاجة دي لا في ايدنا ..لا في ايدكم.
* لكن الحاجة البنطلبها منكم ان تلبعوا لينا كورة ..بهدوء ...قدموا لينا عرض جيد..من بعد ليس مهمة النتيجة.
* الكلام البنكتبوا دا ما تشتغلوا به.
* العبوا كورتكم بس.
* نحن ما عاوزين منكم اكتر من تلعبوا بي (مزاج).
* في حاجة احسن من كدا ...ألعبوا بي مزاج.
* عندما تلعبوا بي مزاج ما في حاجة بتقيف قدامكم.
* متعونا بالكورة ..الدنيا دي ما فيها حاجة.
* يعني شنو؟...تغضب ..تزعل ..تتكلم ساكت...انسي اي حاجة.
* 90 دقيقة ما كتيرة علي جماهيركم.
* 90 دقيقة ما صعبة عليكم كي تقدموا فيها كل ما تملكون.
* بل حتي ذلك لا نطلبه.
* قدموا لنا بعض ما تملكون ..سوف تنتصروا ان شاءالله.
* ومثلما سوف يعطيكم لاعبو الهلال كل الابداع في 90 دقيقة.
* عاوزين من الجماهير في 90 دقيقة..ان تقدم كل الحب للهلال.
* انسوا هيثم ..انسوا خليفة ..كامبوس ..صلاح ادريس..انتوا الليلة بتشجعوا الهلال.
* بتشجعوا الطيب عبدالله ..صديق منزول ..النقر ..اسامة الثغر ..والي الدين.
* انتوا الليلة بتشجعوا الهلال وهذا يكفي.
* اخلقوا تلك (الصحبة)..قدموها لي اولادكم لاعبي الهلال.
* عندما ينتصر الهلال ..اي حاجة بتبقي زي السكر.
* ما في مشكلة...المواصلات بتبقي فاضية علي طريقة عادل امام ..والرغيف ببقي كبير ..والشفع بطلعوا في الشارع ..يلبعوا ويضحكوا.
* الدنيا قبالة عيد ...الناس عاوزة تعيد.
* عاوزين يشتروا حاجات العيد ..هدوم الشفع ...والملايات والستائر والحلويات.
* الناس عاوزة تخبز..
* الحاجات دي كلها ما بتكتمل لو ما انتصر الهلال.
* عشان كدا انتصروا لينا...وانتصروا لانفسكم ..وقدموا من العطاء ما يجعلكم جديرون بالانتصار.
* ما في حاجة بالساهل.
* لو عاوزين المجد والانتصار والصعود انتصروا علي المريخ.
* ولو عاوزين تنتصروا قدموا من الجهد ما يجعلكم جديرون بالانتصار.
* خلونا نعيد من الليلة...خلونا نفرح.
* عاوزين نشوف الفرح في العيون العسلية زي ما شفناه يوم ان انتصر الهلال علي الاهلي المصري.
* انتوا دائما في الموعد...عندما واجهتم ناساروا قلتوا كلمتكم ومتي ما كان الرهان عليكم...كان الذي يراهن عليكم كسبان.
* نحن نراهن عليكم اليوم.
* ليس عندنا شيء نراهن عليه غير ثقتنا فيكم.
* يا مهند عندما تلعب بي مزاج بعيدا عن الضغط يكون دونك حتي ميسي.
* وعندما تلعب يا فييرا باعصاب هادئة تكون مثل عوض احمودي وهو يداعب بانامله اوتار العود.
* يا فييرا تذكر انك كنت لاعب سابق في المريخ ..وان جماهير المريخ كثيرا ما هتفت باسمك عندما كنت تلعب للمريخ..فلا يغضبك منهم شيء.
* ليس هناك رد جميل للهلال وللمريخ معا غير ان تكون اليوم في كامل اناقة الاداء.
* اثبت للجميع المريخاب قبل الهلالاب انك جدير بان تلعب في الدوري الاوربي.
* اثبت لنا جميعا انك من افضل لاعبي السودان ..ليس في هذا التاريخ ..بل في تاريخ الكورة السودانية.
* يا المعز ..الاداء الجميل يبدأ منك ..انت تمنح كل الهلالاب الثقة..ألعب من غير ان تستفز احد في المريخ تكون اجمل.
* قد يظلمكم الحكم ..قد تحدث بعض الاشياء في المباراة..حافظوا علي مزاجيتكم العالية..وعلي تركيزكم.
* نحن الليلة ما عندنا مشكلة مع المريخ غير ان ننتصر عليه بادب واداء قوي ومقنع.
* خصومتنا للمريخ اليوم سوف نعطلها نريد ان ننتصر بالمنطق لا بالخصومة..بالحب ..لا بالكراهية.
* سوفوا تكونوا باذن الله وتوفيقه في الموعد.
* الانتصار سوف يكون من نصيب الهلال ..اذا اي هلالابي دخل الكورة.
* ما تكسلوا ..عاوزين كل الامكنة والمقاعد في المدرجات تمتلأ بكم.
* عاوزنكم تكونوا حضورا في مباراة اليوم لتشهدوا صعود الهلال للمربع الذهبي.
* عاوزين نحتفل بالصعود..وهذا لن يكون دون ان تكونوا شركاء في هذا الانجاز.
* المريخاب مقتنعون انهم خرجوا..وان انتصارهم علي الهلال سوف يدخلهم في حسابات صعبة.
* انتصار المريخ سوف يدخله في متاهات اصعب من لو ان المريخ خسر.
* المريخ اذا انتصر ح يدخل في مطب جديد.
* لذلك سوف يأتي المريخ وهو مهزوم تلقائيا..لذلك وجب ان تستفيدوا من هذا العنصر.
* اذا سجل الهلال في اول ربع ساعة سوف تكون المباراة اجمل والدنيا سوف تكون احلي.
* هدف واحد في البداية سوف ينهي امل المريخ كله وسوف يجعله خارج نطاق الخدمة.
* هدف واحد في البداية يجعلكم تلعبون بشكل افضل.
* هناك مشاكل كبيرة في المريخ ونقص في كل خطوط المريخ وهذه عوامل تمنحكم الثقة وتجعلكم الاقرب للانتصار.
* العوامل والاسباب تهيأت لكم فلا ترفضوها.
* انتصروا ..يوفقكم الله ويسدد خطاكم.
* ملحوظة: الله غالب.
هوامش
* ما تقول الهدوء الذي يسبق العاصفة ولكن قول سادومبا الذي يسبق العاصفة.
* غايتو سادومبا دا يوم بكتل ليه (امير دامر) يا شجرابي.
* امير دامر امس اليوم كلو قالوا قاعد يذاكر في (الجغرافيا).
* عاد الجغرافيا بتمرقكم يا امير دامر.
* اقول ليك حاجة ..شوف ليك (مطرة) اتخارج بيها.
* قلت ليكم قالوا جوبا فيها (امطار) غزيرة.
* غزيرة في عينك.
* امبيلي طبعا وقت عرف سفاري موقوف عارفين عمل شنو؟.
* امبيلي قال : سفاري قاعد وين في المقصورة؟.
* الزول دا قال عاوز يصلو بين الشوطين في مقصورتو.
* انت يا امبيلي كمان ما تبالغ.
* شوف لينا (الباشا) دا ..خليه يراجع (الفيزياء).
* غايتو الهلالاب جابوا ليهم لاعبين اسرع من (العاصفة).
* قولوا ما شاءالله.
* ليه حق اكرم الهادي سليم وسفاري يعملوا فيها عندهم (ظروف).
* ظروف شنو في البرد دا؟.
* خايف علي المريخ من (خليفة).
* المريخاب بركزوا مع سادومبا وامبيلي..وخليفة بجي من الخلف.
* خليفة لو جاب ليه قون في المريخ بثبت في تشكيلة المنتخب البرازيلي.
* ليه اصلو عاوز يجيب ليه قون..وإلا عاوز يطلع ليه جنسية برازيلية.
* انتوا اصبروا ما تضيقوا.
* العيد جاكم.
* اتمني مشاركة ايفوسا..عشان الزول دا ظاهر عليه عندو كلام في صدرو.
* المريخاب ما عارفين يلقوها من منو وإلا منو؟.
* شيء سادومبا وشيء امبيلي وشيء مهند الطاهر وشيء حمودة وشيء فييرا وشيء هيثم مصطفي وشيء ايفوسا.
* الظاهر عليكم الليلة بتحتاجوا لي (زيكو).
* زيكو في البرد دا.
* كلموا اي واحد منكم يشيل الكورة ويتخارج.
* ناس سادومبا وامبيلي ديل ما تقعدوا ليهم.
* لو قعدتوا ليهم بفرتكوكم.
* والفتركة في المطر ما كويسة.
* قلنا سا شنو؟.
* سا سادومبا يا جماعة.
* طيب كا شنو؟.
* كا كابوندي ...مية مرة نقول ليكم الكلام دا.
* خبر عاجل: باقي المطر
الجمعة فبراير 10, 2012 10:55 pm من طرف 
موضوع: طاعت القمر 
