غزل في السستر

غزل في السستر
د. أحمد الأمين محمد - المتججه الأممي
أنا العيان
حرارتي الضاربة فوق ميتين
و لا بينفع بخور تيمان
ولا بتنزل بنوفالجين
رقدت سنين
سريري تعب
مركب فوق وريدي درب
تعب و رعب
جحر عيني يدخل فارة أم سيسي
و أجرجر نفسي بالسيسي
أتقول مخنوق
مصنقع فوق
و كل ما يوم يشيلوا الدم
يزيدوا الهم
يقولوا مقاسو طالع كم.. و طالع كم
و أنا الساكت و غالبني
و غالبني
محل ما أشوفها أتكلم
و ما بسلم
و حاكي البلي و الشمبر
و كان قمت
بقع في السلم أتكسر
عشان تظهر
تمر بسراير العنبر
و تاخد نبضي بت سستر

عيونها الزي عيونها براها
تطعن بالإبار مرضاها
و إبرة ترك و في منديل
وما بتتعب
تكركب في البلاط كركب
وقلبي يدق يسو رب رب
و ناري الليلة تتعلق
دا عنبر كم؟ و شايل كم؟
دكاترتو كم؟
و فت سستر؟؟؟

تجهجه في خلايق الله
و أنا العيان
حرارتي المابية تتدلى
أدوش دوشة
أهضرب هضربة زولا
رقد في برشو خت رويسو فوق بنبر
و لما الناس تقول هستر
وتتغالط.. أظن هستر
أظن دفتر.. أظن بامية.. أظن كستر
أدق الطارة وأتحكر
أدوبي أشكر السستر
أوصف في بنات آوى
كضب كان قالوا بتداوى
و فاضل في المداواة الكي
و ما أظن زاتو ينفع في
أدوخ كلما العيون ترمش
و لما السلسلة تكشكش
أزوغ أتضارى في الكورودور
واخدر لابسة بقت نور
و خاتة الكاب على جنبة
و راشة الريحة فايحة زهور
تموت كرعي أقع و أزحف
وراك طرطور
عشان أرتاح
عليك الله و عليك الله
تفجخي راسي بى ساطور

بت هندسه

انا راسى جاط ما بين هواك والدبرسه
الفت عشرين الف بيت سبعين قصيده مؤسسه
شان مره الفت انتباهه ومره اقدر احسسه
يا حلوه يا بت هندسه
يا حلوه يا زينت البنات يا نجمه الليل و المسا
انا رغم اشكال الشتات حاضن عواطفك وحارسه
انا فى هواكى بقيت فتات ودخلت عشرين مدرسه
جنيت مع كلمات هواك بى قلبى قاعد اتنفسه
يا حلوه يا بت هندسه
كان شفتى يا بت هندسه........
خطواتى دايما بالغلط وامورى ديما معكسه
يوم داك مساهر فى الهدوم وكويتا جت شان البسه
لقيتا الصباح حقات اخوى وهدومى قاعده مكرفسه
كان للهدوم ما مشكله بشوف لى مصيبتا البسه
لكن هواك اعملو ايه دش دش عضامى وهرسه
داير لى فرصه اكون قريب طبله قليبيك افلسه
عشان تشوفى هواكى كيف بهدل عواطفى ودعفسه
كلماتى ليك اتبشتنت ما زى زمان متهندسه
حتى الشعر الكان زمان كلماتوا حلوه مملسه
هسى اتلخم بقى كيف كده مافيهو كلمه مهندسه
انتى السبب فى كل دا يا احلى اسباب الاسي
يا حلوه يا بت هندسه
انا ياخ بريدك اعمل ايه ورينى يا بت هندسه
امشى واكورك فى الظلط يا ناس بريد بت هندسه
كم مره قلت اقوم براى واقد معاها واحدثه
لكنى ما بقدر عديل مابقدر انضم اونسه
خليك من اشرح ليها حالى وحبى ليك والدبرسه
يا هنايه داير اقوليك كلام اصلو السكوت فيو وسوسه
انا يا ملاك انا بعشقك وما اظن بلاك ارجا المسا
دايرك تكونى لى حبيبه وابقى ليكى حبيب قسا
اكسيك هواى وتلبسينى نعيم هواك اجمل كسا
ويا ربى كل عاشق نبيل تديهو زى بت هندسه
وترعاها من عين الحسود ومن توب جمالك لبسه
ويا ربى تحفظا لى براى ويا ربى تحفظا تحرسه

الفار وقف
جنب القفص
سافر خيالو سرح بعيد
لو اكرمو رب العباد
جكسوية واحدة من الجداد
يتزوجا .. ويعيش سعيد
تكفيهوا لا شركاً يصيدو
ولا كديس
تحميه من حظو التعيس

فطورو بيض

وغداهو بيض

وعشاهو بيض

أحلامو بيض

صاحبنا ما اتردد وقال

قال لي الجدادة تعالى جاي
انا عندي ليكي كلام كتير
قالتلو هاي يالفار اخوى
ان شاء الله خير
قال ليها خير
بس منكسف
قالتلو قول ما تنكسف

الفار رجف

طقطق اصابعينو ووقف
قال للأسف
انا ما بقول
احساسي واضح
ومشاعرى ما عايزة الفضول
الجدادة استغربت
اتنفضت واتهوززت

تليهو

ياخ ما تقول يا فار
صاحبنا قام
قال ليها طمعان في الجوار
الجدادة اتدللت
قاتليهو هيي ما انت جار

لفار سرحا

راح الكلام منو ووقع
قال لي الجدادة بلاش دلع
لو جاكي فار طالب القرب
طالب ايديك
طالب الغرام من مقلتيك
رايك شنو؟

قالت ليهو اببببببببببيك

ما يسمعك في الحلة ديك
الفار كضم شم الوضع
شتت مشى
وعيونو من كتر الزعل
ما شايفة حاجة مطششة
ومشاعرو كيف متخربشة

حرد الفطور

حرد العشا
ورسم على جدار الزمن
صورة الجدادة ونقشة
وقال الجدادة قست علي
وعملت علي متحنكشة
باكر بعرس ستها
تمسح دموعي تقشقشة
باكر بعرس ستها
تمسح دموعي تقشقشة

الغزل************ الغزل

الغزل هو ذكر الصفات الجميلة للمحبوبة للتودد اليه , وفي المعجم الوجيز غزل غزلا اي شغف بمحادثة النساء
والتودد اليهن , ويوجدلفظ عصري أخر وهو المعاسة وفيه يتلفظ المعاكس بعبارات الاعجاب بالطرف الاخر وقد تكون هذه العبارات صريحة او رمزية ولكن في الغالب غير جارحة
والظاهر بنت هندسة وقعت في شباك الشاعر
وكانت ما حصل

المهم دعونا نشوف الغزل في الاسلام

هذب الإسلام
الغزل في هذا العصر فجاء الغزل في هذا العصر أكثر تعففاً لكن بالرغم من
هذا ضلت طائفة من الشعراء تعاقر الخمر في اشعارها وتشبب بالنساء و تتغزل
بهن غزلاً فاحشا امثال ابي محجن الثقفي، لكن عموم الشعراء اتسم شعرهم بالغزل العفيف الذي لم يقف الإسلام بوجهه والدليل على ذلك ان كعب بن زهير عندما مدح الرسول محمد بدأ قصيدته الشهيرة بالغزل ومنها:
بانَت سُعادُ فَقَلبي اليَومَ مَتبولُ

مُتَيَّمٌ إِثرَها لَم يُفدَ مَكبولُ

وَما سُعادُ غَداةَ البَينِ إِذ رَحَلوا

إِلا أَغَنُّ غَضيضُ الطَرفِ مَكحولُ

هَيفاءُ مُقبِلَةً عَجزاءُ مُدبِرَةً

لا يُشتَكى قِصَرٌ مِنها وَلا طولُ

تَجلو عَوارِضَ ذي ظَلمٍ إِذا اِبتَسَمَت

كَأَنَّهُ مُنهَلٌ بِالراحِ مَعلولُ

شُجَّت بِذي شَبَمٍ مِن ماءِ مَحنِيَةٍ

صافٍ بِأَبطَحَ أَضحى وَهُوَ مَشمولُ

تَجلو الرِياحُ القَذى عَنُه وَأَفرَطَهُ

مِن صَوبِ سارِيَةٍ بيضٍ يَعاليلُ

ولك الثناء الاخ الشيخ عالمجهود الراقي

الاخت ام عبد الله مرورك تاج علي راس الموضوع

نشكرك علي لمساتك الرائعه التي اعطة الوضوع رونق وبهاء

الشيخ الغالي
مشكور يارائع

لك شكري وتقديري اخ الدهشان مرورك جد اسعدنا