منتديات ضل الضحى


اجتماعى ثقافى شامل
 
الرئيسيةالبوابةاليوميةمكتبة الصورس .و .جبحـثالأعضاءالتسجيلدخول
بحـث
 
 

نتائج البحث
 
Rechercher بحث متقدم
المواضيع الأخيرة
» نداء لبقة وخليلى والشيخ عثمان
الجمعة فبراير 10, 2012 10:55 pm من طرف خليلى

» اياك التدخين
الجمعة فبراير 10, 2012 10:51 pm من طرف خليلى

» دعـــــــــاء
الأربعاء أبريل 27, 2011 1:22 am من طرف ابواشجان

» النداء التاني للادارين
السبت فبراير 26, 2011 7:10 am من طرف ام عبدالله

» وفي ال عشرين و الحادي عشر
الإثنين فبراير 14, 2011 6:26 am من طرف ابو اشواق

» زكريات من الاراضي المقدسة
السبت ديسمبر 18, 2010 1:52 am من طرف ابواشجان

» كل وحده او واحد تدخل تقول شو تتمنى اليوم
الإثنين ديسمبر 13, 2010 4:20 am من طرف ابواشجان

» ما راح تصدقون
الإثنين نوفمبر 22, 2010 3:58 am من طرف ابو اشواق

» الحريق
الإثنين نوفمبر 22, 2010 3:35 am من طرف ابو اشواق

ازرار التصفُّح
 البوابة
 الصفحة الرئيسية
 قائمة الاعضاء
 البيانات الشخصية
 س .و .ج
 ابحـث
منتدى
التبادل الاعلاني
احداث منتدى مجاني
المتواجدون الآن ؟
ككل هناك 2 عُضو متصل حالياً :: 0 عضو مُسجل, 0 عُضو مُختفي و 2 زائر

لا أحد

أكبر عدد للأعضاء المتواجدين في هذا المنتدى في نفس الوقت كان 21 بتاريخ الجمعة يوليو 29, 2016 3:02 pm
سبحان الله العظيم وبحمده ( مائة مرة )

شاطر | 
 

 الاعمال الكاملة للشاعر هاشم صديق

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
ابو اشواق
المنظم العام
المنظم العام
avatar

ذكر عدد المساهمات : 208
نقاط : 33808
شكر وعرفان : 3
تاريخ التسجيل : 03/09/2009
العمر : 35
الموقع : www.google.com

مُساهمةموضوع: الاعمال الكاملة للشاعر هاشم صديق   الأربعاء نوفمبر 18, 2009 2:11 am

ياتو ورقاً إتمضى
وكان دوانا من الأذى ؟!
ياتو ظلماً إتنسى
بس عشان مكاً ضحك
أوعشان سيداً عفا؟!
-----------
ياتو خطباً في إضينَا
جمّلت في عيونا شينة ؟
وياتو تلفاز
ياتو رادي
ياتو راوي
ياتو زينة
لبّست عريانّا توب
وبدلت طعم ( السخينة) ؟!
وياتو حلماً في عصورنا
ما صبح باللّت عجينة؟!
وياتو مركب في بحرنا
طاش صوابها
وهدهدت أعصابا مينا؟!
وياتو راجلاً بالبشارة
جانا من أقصا المدينة
و ب( البشاورة)
كان مسح سبورة الرحلة الحزينة
وكان غرس في الليل بشارات الرتينة
وشفانا من جوع أو حفا؟!
--------
ياتو مسرح إبتدا
وأسيادنا ماكانوا الفوارس
ونحنا كومبارس الحوادث؟!
وياتوا والي في المنابر
ما خطب فينا ونهر مليون شهر
ونحنا قاعدين في البنابر
قدامو زي شفع مدارس؟!
وياتو دستور ماصبح في راسنا قمبور
وياتو إعلان أو بيان
ما إنغرس في حلوقنا أحزان ؟!
وياتوا لحما للعضام يوما رجع
وياتو آذانيا عسس ( مالطة) انسمع ؟!
وياتوا صفا إنقسم وعاد يتمم وانجمع؟!
ويا رتبة وياتو قبة ما بقت في اللفة كُبة
وياتو صوتا من وجع دمدم هتف
ما انقطع حبلو ونزف
وبالأوامر والكوامر إتنفا ؟!
أحلام بتنقح طول دبابيس الليالي
ولما حمر الدنيا يصبح وما انجبر
يا دنيا خاتر لسه لافانا المواجع
والصفافير والمواتر
سيدا مرق ،
سيدا رجع ،
مكّاً دخل ،
مكاً طلع ،
شيخاً لبد ،
شيخاً نبل ،
سيفا ضحك ،
كشَّر كتل ،
ورقا جبل ،
ورقا سهل ،
صدقاً أفل ،
كضبا لمع ،
صنماً وقف ،
صنماً وقع،
كفاً عصر،
كفاً قلع ..
---------
والأماني
لسه في حال (الصواني)
لقمة طاعمة وبي كرامة
حبة إحساس بي السلامة
رجعة لي قيف الشهامة
مرقة من عصر القيامة
فرحة ما تكمل ندامة
لاها قصراً أو دواير
لاها بستان أو مناظر
لا ( مول) في ( وادي شنقول)
وكبري طاير في ( القماير)
لاها أموال في الخفا.
----------
أعفونا من كتر التحالف
والتخالف
والشراكة
والشياكة
والمواثيق
والتواثيق
والورق.
كم مرة أذنا الفجُر
قبال نفيق شفقو إنسرق
كم مرة بشّرتو الحشوم
أكلت عديل
مُر الصفقْ
كم مرة جربنا البيان
كم مرة جبناكم عيان
نشف البلد قلبو إنحرق
-------------
الشعب وين يا مؤمنين
ودستوروا في حلة إنسلق؟!
و ( القسمة) في ثروة منو
والشعب بي جوعو إنشرق
و(النسبة) في سلطة منو
و( سكرنا زاد)
( بالنسبة)
في الدم إنطلق
-----------------
إنتو الفوارس والمكوك
الداير يبيع تدوهوا ( في جاهكم يلوك)
واللسه ماسك في الجمر
يا ريتو بس يلقى النبق
والجوع يقطع في الحشا
ألفين سنة
----------
أدونا بس حق الصبر
خلونا من غش الكلام
وعد الرخا ، وليلة القدر
خلونا من كضب البشاير في القصايد والجرايد
أدونا بس حق الفطور
أعفونا من حق ( العوايد)
و( النفايات)
والدوا
وكفاية ( فك عكس الهوا)
-------------
يا مؤمنين الشعب وين؟
تاكلوا الثمر والشعب تدوهوا النوا ؟!
خلونا من حشد المواكب بي أجاويد الجرايد
والإذاعة
والإشاعة
وبي مناشير الوظيفة
كم مرة دقيتو النحاس
في لمبة طقت وطرشقت
أو ( ذرة) جاتكم حتى لو كانت خفيفة
أو ( نبلة) ناشت باب جنابكم
وعطسة قدت للرهيفة
أو هاجسة مرقت
من عقول عسس الخليفة.
----------
خلونا نمرق من هدومنا
ونغلي نهتف للكرامة
والشهامة
والحساب الفي الكتاب
وللرغيفة وللحليفة :
ما في جحرا تاني بلسع
ومافي عذرا للفوارس تاني بشفع
ومافي ومضا في عقولنا الصاحية نلقاهو إنطفا
وما في رجعات تاني للشوك والجفا
وورونا كيف ننسى الكوارث يا فوارس
الإنكسار
الإنشطار
الإنحسار
الذلة لي ناساً كرام
موت العروض
دك الفروض
بلع الحرام
وورونا كيف بس لينا يوم ( بعتوا الترام)؟!
ورونا كيف لمعت وشوش
كبرت كروش
وأنحنا ناس ربط الحزام
كَسر الخراب مرق البلد
حتى النفوس صبحت حطام
أدونا بس فرق العمر
سووا المعاش حبة لحم فوق العضام
أو ضحكة من جوه القلب
أو لمبة في جوف الضلام
ولو أصلو موت ، أدونا موت حق الكرام
-----------------
خلونا من جنس التخاريف في الثقافة
ومهرجانات السخافة
أدونا بس حبة ( كنافة)
ياتو حرفا يوم هتف بي غبنو أو صادم وقف
أشر علي حق ( إتلهف)
أو علي خطف الشرف
أو غنى للناس والشمس
وإتحدى للظلمة وعزف
وما اتخنق صوتو ونزف ؟
---------------
حرية وين يا مؤمنين؟
صوتنا وين يا موحدين ؟
الشعب وين في السلطة يا امة محمد ويا يسوع
القسمة في المال والحكم ولاّ المظالم والدموع ؟؟
يا شراكة
يا تحالف
يا تخالف
يا شياكة
يا قباب
يا رهاب
يا خطابة
يا شيوخ
يا شلوخ
يا مهابة
إنتو الفوارس في المسارح
ونحنا كومبارس الغلابة.
إنتو أبطال القصص
ونحن التلاميذ في الحصص
إنتو الأكابر في المنابر
ونحن حراس المقابر
بتصدقوا؟
أو تضحكوا ؟
قسماً عديل يا نبقى نحن السادة والحق والقيادة
وإنتوا خدامنا وزيادة
نطلع نكون نحن المنابر والإمامة
أوتقوم بينا القيامة .
الشعب ما ضحكة وقمامة
والصنّة ما بر السلامة
---------------
يا ناس كفاية من خراب
نبل الضماير والهواجس في البشاير
ومن طلاسم جاية باكر
ومن تعاويذ الولادة
ومن كضب يوم السماية
ومن تهاليل البداية
ومن عويل خط النهاية
ومن صراع كل الديوك للكراسي وللولاية.
-----------
يا ( مبيور) ويا ( جلابة)
أنحنا الشعب سدْرنَا ولَّع
وكركب تب
حتفاوضونا ؟؟
ولا نولِّع ونبدا حرابة
نخش الغابة ؟؟
ياتو ورقا إتمضا
وكان دوانا من الأذى
وياتو ظلما إتنسى
بس عشان مكاً ضحك
أو عشان سيداً عفا ؟!


_________________


عدل سابقا من قبل ابو اشواق في الأربعاء نوفمبر 18, 2009 2:16 am عدل 1 مرات
الرجوع الى أعلى الصفحة اذهب الى الأسفل
http://khishimat2.ahlamontada.net :www.google.com
ابو اشواق
المنظم العام
المنظم العام
avatar

ذكر عدد المساهمات : 208
نقاط : 33808
شكر وعرفان : 3
تاريخ التسجيل : 03/09/2009
العمر : 35
الموقع : www.google.com

مُساهمةموضوع: رد: الاعمال الكاملة للشاعر هاشم صديق   الأربعاء نوفمبر 18, 2009 2:14 am

شكراً جزيلاً

للخناجر ..للمغايس.

للمتاريس..للدسايس

للطريق

لامن يضيق.

للوَجَع

سوّى البِدَع

فَتّح مداَرس



شكراً جزيلاً

للأمل وسط السراب

لي حُراب

ناساً قراب

للعذاب

في كُلِّ باب.

للمَحكّات العجيبه

والمشاوير الغريبه.

لي تمن

عِشْق الوطن

جمرِ الضريبه.



شكراً جزيلاً

للعُصار.

للغُبار.

للبروق

الباقّه نار.

للاسى.

اللفّ الجزيره.

للأذى

الكتب الغنا

وضَوّ البصيره.



شكراً جزيلاً

لي سلاطين

الحساده.

للصعاليك

والسَياده.

للإبر

فوق الوِسَادَه.

للحُفر

في كُلْ ممر.

للركوب

وسط الخطر.

لي ملوك

فن النميمه.

للأباطيل اللئيمه

والأساطير

القديمه.

لي جَبُر

كسر العزيمه

والعبور

فوق الهزيمه

_________________
الرجوع الى أعلى الصفحة اذهب الى الأسفل
http://khishimat2.ahlamontada.net :www.google.com
ابو اشواق
المنظم العام
المنظم العام
avatar

ذكر عدد المساهمات : 208
نقاط : 33808
شكر وعرفان : 3
تاريخ التسجيل : 03/09/2009
العمر : 35
الموقع : www.google.com

مُساهمةموضوع: رد: الاعمال الكاملة للشاعر هاشم صديق   الأربعاء نوفمبر 18, 2009 2:26 am

الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن
-أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر
(بالعرقي) الداشر
والليل مصبوغ
بي رحية (المزة)
...
الرادي يكورك
وسط الحوش
-افغانستان
موت أفغان
-مستر بوش
وخواجة بيصرخ
وصوته مرخرخ
زي (حنكوش)
-القصف يدك
أركان (كابول)
...
ووالدة (صابر)
حاجة (بتول)
مشدوهة تقطع
عيش الفتة
تكب سرحانة
في موية الفول.
-يوماتي عشاهم

(فتة بوش)
والرادي يساسق
بين (بن لادن)
ومستر (بوش)
وصابر يطنطن
-الصاح مقلوع
السيف مرفوع
الكلمة غموض
والمغنى فروع
الدنيا خراب
والأقوى مهاب
والعدل رهاب
...
الليل مشروق
بي فتة فول
وصوت (الحاجة)
الوالدة (بتول)
يناغم صابر
-شنو الإرهاب؟
ويتمتم صابر

قلـ...قلتي
شنو؟
وترد (الحاجة)
-مالك مرعوب؟
تتلفت ليش؟!
تقول مزرور
بي عسكر وديش؟!
سألتك بس
شنو الإرهاب؟!
واتنحنح (صابر)
صنقع ودنقر
حك رويسو
اتمدد وصنقر
وقال للحاجة
-سؤالك يمة
جوابو كتاب
لكن....
لكن يا (حاجة)
زي ما تقولي
طلع ربّاط
في الليل
لي زول
بي سيف مسلول
وشال من جيبو
قروش العيش
وحق الفول
أو زول آمن
يقع في مكيدة
يموت مكتول
وزي تغيان
على الفقران
على المسكين
على الأعزل
على المشلول
...
وتتدقق
غبينة (الحاجة)
زي راجمة
وتصبح ناغمة
-وحسع نان
منو الرباط؟
امريكا؟
(بن لادن)؟
ولا الأفغان؟
من التغيان
منو المسكين؟
من المظلوم
(مستر بوش
ولا فلسطين؟
شنو الـ......
منو الـ....
...
ضحك (صابر)
وحك رويسو
واتنحنح
وقال للحاجة
-يمة اتعشي
أكلي البوش
لو عارف ردود
لي ديل
ما كان الرويس
مدووش
...
سكت صابر
رقد معبور
وصوت الرادي
لا في الدنيا
لسة بيدور
سرح صابر
ودمو يفور
نكش حزنو
وقال لي نفسو
من قلبو
أريت الدنيا
حسه تغور
...
سمع صوت أمو
تاني يلح
-دحين يا وليد
بدور أسأل؟
ويرد صابر وضيق العبرة
طعمو ملح
نعم يمة
قايلك نمتى
وترد الحاجة
أنوم كيفن
وصوت الرادي
في أضني
زي مكنة؟!
بدور أسأل
دحين أمريكا-
ما ياها
العذابا دنا؟؟!
...
ويرد صابر
وضحكو علا
-عذاب أمريكا
ولا هنا؟؟!
عذاب أمريكا
ولا أنا؟
ويصن لحظات
-دحين يمة
-ورمضان جاي
هم أمريكا
ولا اللقمة
والويكة الرادي يساسق
بين بريطانيا
وبين أمريكا
...
و(صابر) سارح
لنفسو يصارح
-يا صابر هوي
رمضان جاييكا
حجتيب من وين
قروش السكر
وحق الويكة؟!
..
(الرادي) يناهد
وسط الحوش
بين (بن لادن)
و(عمر المُلا)
و(مستر بوش)
-تصريح
من لندن أخبار
من (غزة)
وجيران صابر
عاملين (قعدة)
انقلبت (ندوة)
في الكأس العاشر...
ترد الحاجة تفتش لكيس
تمباكا
في الكراب
نقول همين
عذاب وعذاب
تخت السفة
وتبرطم
-دحين يا وليد
ده مو الإرهاب؟!!
...
ويصن الليل
ورأس صابر
يدقدق ساي
يشرق جاي
يغرب جاي
- كراتشي
- أباتشي
- أنقرة
- عنقرة
- ربع الويكة
- صوت أمريكا
- جمرة خبيثة
- مكيدة دسيسة
- بي. بي . سي
- أي. أن. تي
- سي. أن. أن
- توني بلير
- كلام الطير
- خبر وحواشي
- إبراهومة
- أموكاشي...
ويقع صابر
في بير النوم
ويشوف روحو
بدل (أمجاد)
ركب بعشوم
وشاف الناس
توسوس ساي
خبر يا هناي
ست الشاي
أف. بي آي
وأحمد بيه
سي . أي. أيه
ووسط الموز
لقينا (كروز)
-برج كلتوم
ملان بحمام
وقع صاروخ
شق حشاهو
سكن جواهو
سوا حطام ويغوص صابر
غرق أكتر
في بير النوم ويشوف الحاجة
امو (بتول)
وسط الزحمة
رافعة أيدها
بي قندول
تكورك وتهتف
- لا أمريكا
- بل فتريته)
(أنحنا الساس)
رافعين رأس
ما ببنتراجع
ما بنتهان
ما بنخاف
الأمريكان
...
ويشوف صابر
بيوت الحلة
تتغامز
وتتريق
على الحاجة
وتتلامز
ووسط اللمة
صوت الحاجة
عالي فصيح
(تشيلو الريح)
...
صوت الرادي
مابي النوم
الموت أخبار
الظلم حصار
الرعب خيار
والليل حزنان
الليل عريان
والقمرة هدوم
الليل مفضوح
والنجم كتوم
الدينا تصن
لقيامة تقوم
صابر مجروح
في نومو
يئن
وفي الرادي تجن
بالتار
(بيق بن)
والنشرة تجيب
أخبار الشوم
كابوس صابر
قفة خضار
سوت جنحين
طارت لي فوق
والفاقة مطار
...
كابوس صابر
يعلم أيه والدنيا مصالح
وسي. آي. أيه
...
كابوس صابر
الناس بتوسوس
وتنضم ساس
ست الشاي
أف بي آي
...
كابوس صابر
الدنيا مغازي
يموت الحب
ترمي أخوك
في بطن الجب
وتترتر غادي
تناصر الغازي
...
كابوس صابر
الكلمة ضحية
إرهاب مشروع
وإرهاب وحشية
ضحايا غبش
وضحايا غنية
...
كابوس صابر
الناس (بالقرجة)
تقيف للفرجة
تغير لونها
ميتين درجة
...
كابوس صابر
هم الويكة
والفتريتة
ونار أحزانو
ونار أمريكا
...
كابوس صابر
الصاح مقلوع
السيف مرفوع
الكلمة غموض
والمعنى فروع
الدنيا خراب
والأقوى مهاب
والعدل رهاب
الرادي يلغلغ
وسط الحوش
بين (بن لادن)
و(عمر الملا)
ومستر بوش
- أفغانستان
- موت أفغان
- القايمة تطول
- عراق.. سوريا
- جنوب لبنان
- وما معروف
- تاني كمان!
تجي الحملة
عقاب جملة
(على الإرهاب)
...
على الإنسان؟!
القصف يدك
أركان كابول
ووالدة (صابر)
حاجة (بتول)
حلمانة تقطع
عيش الفتة
تكب سرحانة
في موية الفول
يوماتي عشاهم
فتة (بوش)
والرادي يساسق
بين (بن لادن)
ومستر (بوش)
...
صوت الرادي
مابي النوم
والليل حيران
الليل حزنان
الليل عريان
والقمرة هدوم
الليل مفضوح
والنجم كتوم
...
كابوس صابر
قفة خضار
سوت جنحين
طارت لي فوق
والدنيا مطار
...
كابوس صابر
صوت مبلوع
حق مقلوع
والموت بالجوع كابوس صابر
يعلم أيه
والدنيا مصالح
وسي. آي. أيه
...
كابوس صابر
الناس بتوسوس
وتنضم ساي
ست الشاي
أف. بي. آي


_________________
الرجوع الى أعلى الصفحة اذهب الى الأسفل
http://khishimat2.ahlamontada.net :www.google.com
ام عبدالله
المشرف العام
المشرف العام
avatar

انثى عدد المساهمات : 120
نقاط : 3305
شكر وعرفان : 42
تاريخ التسجيل : 06/10/2009
الموقع : <br><img src="http://zoom.maktoob.com/showImage.php?ImageID=1001038987&size=500" alt="">

مُساهمةموضوع: رد: الاعمال الكاملة للشاعر هاشم صديق   الأربعاء نوفمبر 18, 2009 3:53 am


عَزم الغَلابة[/center]

مسكين أنا

ومسكين أبوى

مسكينه أمى..وبرضه أختى

كمان أخوى

لكن - ورغمَك يا شَقَا-

بَرضُه راكزين زى بَلد

الليل سَرَحَ فيها ومشَىَ

وسَاوم عيونها وحَنَّسَها

ولا اتبَدَلت..لا استسلمت

مسكين أبوى

ضامِر مِتِل عوداً نِشِف

ومسكين أبُوه

السَّلَّ سيفو على المدافع

وصاغ صباح مليون حَرِف

ومسكينة أمى

الما غِشَت درب الكتابة

لكنها

ساعة الحريق الشال عُمُر

ناساً عُزاز نصروا الغلابه

عِرفت تَخُط حرفين كبار

رَسِمُهم حِلاَ

ولاَ مِن لَمَع لون الحِبِر

كل البلد صِبحَت دروب

مكتوبه لا

تَعَب حُرُوفها

ضِحكت عيونها

كلام أكيد قالوه غيرى

ودايِر اقول ابيات جديده.

وشان أطوّع للحروف

العارفها مرات عنيده

ساهرت زى قطرة مَطَر

فىجناح سحابة.

وقلت يا أقدر أقول أوصافى فيها

او أصوم من الكتابة.

حاولت أرسُم ضَحْحَتَها

كل ما أحَنِّس فى الحروف

ألأقاها تابى

حاولت تانِى

بديت أعيد رسم الحروف

إصرارى!؟..لا لا

ريدى ليها الطاغى جابها

وفرحت لاَ مِن دمعة رَقَشَت

وخُفتَ تنزل

وللخطوط تَمسَح تَبَدل

وَقَفتَ حيلى بعيد مشيت

قَبَّلتَ تانى رجعت جيت.

زِدت الخطوط عايَنْت فيَها

لقيت نجم شَعّ وْحَضَن

وردة بَنَفسج جوّه غابة.

وكلمة احبك فى الفروع

مكتوبة بى صدق الغلابة.

وكوخ مَحَكّر فى القمر

قلبى البِرِيد لى بابه شابا

وفكرت تلت الليل أفسّر

وين جمال ضحكة عيونها

وين؟وين؟ وهل..؟

وهل أحرف كلامى الفيها دونها؟

وحاولت تانى

ومن جديد سِخَت الحروف

زدت الخطوط اكتر كمان

بَسَمت عيون السمحه من وسط السطور

وشوَيّه من الدايروبان.

وبديت أزيد... ومرات اعدِّل

ولما ألقىَ وَصِف جديد

أفرح واقيف فى الساحه أقدِل

وفى النهاية لقيت عيونها.

والبَرِيق الزى شموس حَاضِن سنونها.

والخدود والجيد... وخصلاتها

البِزِيد غزل النسايم فى جِنونها

كلهن ضاحكين بتَاوقوا من القصيدة

إلإ آه أنا من حروفى الفيها عاجزة

كل الكتبتُه محال يكون أبيات جديدة

محال يكون أبيات جديدة




حضـــور

الموسيقى...

وانتي ممافي.

يجهش الوتر الموتَّر

وينفلت دمع القوافي

والموسيقى

وأنتي في

يصْحَا في جوايا شي

يقْلِد اللحظة

ويزركش

ويبقى نبض الصُحبة

مدهش.

وانعتق من حُزني

حافي

وابقي طاير

جد خرافي


















[center]
ديـــــن

ملامحِك

شاقَّة زَبَد الموج.

وثغرِك ضاوي

من وسط

الرياح الهُوج.

داك قيف الوطن

ياعين.

ديك شُرَف

الوطن ظاهرين.

أنا الراجع

عشان أعْرَق

وأسد الدين.

أشيل

هَم الوطن

في الراس

وأجِز جِذْر الفَقُر

بالفَاس.

وافجِّر

بالحرِف احساس.

منو السَمَّر

مدار عينَي؟؟

منو الكَّتف

صوابْع ايدَي؟؟

منو الصادر

ثمر صوتي

!!بَهَل للناس كلامو النَي؟




























الرجوع الى أعلى الصفحة اذهب الى الأسفل
 
الاعمال الكاملة للشاعر هاشم صديق
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات ضل الضحى :: القسم الادبى :: منتدى الشعر والقوافى-
انتقل الى: